Dei lokale skulesekkane 2005 - 2005
Det som skjer
i kommunane og på kvar einskild skule er fundamentet i Den kulturelle
skulesekken. Tilbodet som kjem frå fylkesnivået er meint å vere ein
del av DKS-innhaldet, og ei hjelp til ei målretta lokal satsing.
Fylkestilbodet vil ofte vere prega av profesjonelle tilbod som den
einskilde skule/kommune vanskeleg kan få tilgang til på eiga hand.
Skal vi lukkast med å få til eit "skulesekkinnhald" som kvar
einskild elev har størst mogleg utbyte av, krevst det eit tett
samarbeid mellom kommune- og fylkesnivå, og ein god dialog mellom
partane på dei ulike nivåa.
Synergiar
På kommunenivået
er ei av utfordringane å tilrettelegge for synergiar av fylkestilboda,
ved at ein t.d. tenkjer lokal oppfølging av tema, musikk, kunstform
o.a. Vi som arbeider med ”sikringskosten” prøver på ulike måtar
å bidra til at tilboda frå fylket skal innehalde
ulike former for læremateriell, der slikt er naturleg.
Forum og planar
Dei lokale
kulturplanane bør politisk forankrast i kommunen. Alle skal vere
tilgjengelege i prosjektbasen til utdanningsavdelinga hos Fylkesmannen.
Ønskjet er at lokale planar speglar lokale særpreg. Vi håpar og trur
at dei einskilde lokale kulturforuma vil vere viktige aktørar i det
vidare arbeidet for eit flott skule-kultursamarbeid i vårt vidstrekte
fylke. Eit godt fungerande lokalledd er også viktig for den vidare
satsinga på fylkesnivå.
Det lokale
kulturforumet blir leia av ein kulturkontakt i kommunen. Dette kan vere
ein tilsett i kommunen si kultureininga, ein kulturskulerektor eller
tilsett i staben til skuleansvarleg. Fleire stader er einingane så små
at det er kulturansvarleg eller skuleansvarleg som også er vår
kulturkontakt på kommunenivå.
Kulturkontakter på
skulane
I det daglege
arbeidet har vi mykje direkte kontakt med dei einskilde kulturkontaktene
på skulane. Frå skuleåret 2005-2006 har vi i eige brev til skulane og
kommunane bede om at kontaktperson for DKS blir den same som
kontaktperson for skulekonsertane. Slik får vi best mogleg administrert
all kontakt gjennom eit ledd på skulane. Så er det opp til skulane å
evt. delegere oppgåvene på fleire.
Vi i saman
Vi som
arbeider med Den kulturelle skulesekken på fylkesnivå i Sogn og
Fjordane ønskjer å vere støttespelarar for kommunane. Så langt
ressursane rekk bidreg vi med informasjonsarbeid og rettleiing, gjerne i
samband med kommunebesøk.
|
