Bibliotekdagane 2002		Landsomfattande arrangement
	HSF sine tenester til fjernstudentar		Bokbåten hausten 2002
	Kva skjer med ”Den kulturelle skulesekken” i fylket vårt?		Bokbussruta
			Breibandskartlegging
	Bollefisen og Dustefjerten		Kurset i Mikromarc 2
	Førde bibliotek markerer Verdas bokdag 2002		Årsmøte i NBF Sogn og Fjordane
			Nytt om namn

Når alt som kan gå gale ser ut til å gå gale -

(“-kan du trøste deg med det at alt blir bra til sist”- Thorbjørn Egner:  Den uheldige mannen)

BIBLIOTEKDAGANE 2002, SOGNDAL 4.-5. JUNI
HOVUDTEMA: LOKALHISTORIE

Tysdag 4. juni starta med godver som bestilt. Glade og fornøgde gjekk vi av bussen, tusla over vegen til hotellet og KATASTROFE 1 var eit faktum: Dei to førelesarane som skulle starte dagen sat på Gardermoen, teknisk feil på flyet, tidlegaste mogelege avgang til Sogndal 13.35.

Biblioteket i Sogndal var alt varsla og krisetiltak sett i verk. Lokale førelesarar som stod på programmet seinare på dagen var raskt på plass. Dei inntok møterommet for å forsikre seg om at alt det tekniske var i orden slik hotellet hadde lova og KATASTROFE 2 var eit faktum.

Heile programmet tysdag var basert på demonstrasjonar via Internett og hotellet sin pc mangla ein eller annan “duppedings” som gjorde dette mogeleg. Underteikna som i løpet av ei lita veke hadde “vakse i alder og visdom” (?) og skulle sjefe midt oppi dette vart ganske svett, resten av forsamlinga syntes ganske avslappa i sola i hotellhagen. Lokale krefter trødde til igjen og ordna anna møterom, snart toga heile møtelyden til Sogndal kulturhus og møtet var i gang.

Først ute var Oddvar Natvik frå Fylkesarkivet i Sogn og Fjordane. Han demonstrerte basene deira, både dei genealogiske (her er det mykje snadder for slektsforskarar) og Kultuhistorisk atlas og leksikon. Alle desse kan utforskast på http://www.sffarkiv.no. 

Gerd Vik frå Sogndal bibliotek fortalde om det lokalhistoriske arbeidet ved biblioteket og om samarbeidsprosjektet mellom biblioteket, fylkesarkivet og DHS-Sogn folkemuseum om sams registrering av samlingane og Lokalhistorisk spørjevev som de kan finne på http://sporjevev.sffarkiv.no.

Eli Lothe, som her representerte Sogn og Fjordane fylkesbibliotek, orienterte om bakgrunn og status for Fjognedok-prosjektet ved fylkesbiblioteket. Basen veks stadig og vi har no omsider fått prosjektmidlar til det vidare arbeidet. Fjognedok finne de på http://www.sf.fylkesbibl.no.

Så vart det eit lite avbrekk i lokalhistoria, vi gjekk over til offentleg informasjon. Susanne Daae-Qvale, eigentleg Sogndal bibliotek, som for tida arbeider i Opplysningstenesta i Staten fortalde om arbeidet der og kva tenester dei kan yte. Ikkje så heilt ulikt referansearbeid i bibliotek, skjøna vi. Vi fekk og nokre “lattervekkande” døme på spørsmål dei kan få. Meir om Opplysningstenesta og noreg.no på http://www.noreg.no.

Endeleg var “austaføringane” på plass og vi kunne avslutte dagen slik han skulle ha begynt. 

Frå Norsk lokalhistorisk institutt kom Marianne Wiig for å orientere om arbeidet deira og planar for vidare satsing med nettportal for lokalhistorie. Det er mykje nyttig informasjon og lenker å finne på deira heimeside http://www.lokalhistorie.no.

Til avslutning stilte Tone Moseid frå Statens bibliotektilsyn spørsmålet: Lokalhistorie - nye muligheter for folkebiblioteket? Ho peika mellom anna på at sjølve innhaldet i biblioteket sine tenester kanskje ikkje har endra seg så mykje - det er forma og kanalane som vert nytta som er nye og at hovudutfordringane vil vere knytt til mellom anna kvalitetssikring, innsamling, formidling og samarbeid. Heile innlegget hennar kan lesast på http://www.bibtils.no/Omsb/taler/.

Så tok vi bussen til Galden. og etter ein fin spasertur ned til Solvorn var det galleribesøk, middag og fagleg(?) prat i salongar, på veranda og i hagen på Walaker hotell i den fine sommarkvelden.

Onsdag 5. juni rekna vi ikkje med at noko kunne gå gale og det gjorde det heller ikkje. Dagen starta med omvisning på Sogndal bibliotek og Høgskulebiblioteket-Fjøra. Takk til Gerd, Signe og Lise for innsatsen!

På samrådsmøtet fekk vi besøk av Bente Hatlevoll frå Høgskulebiblioteket-Fosshaugane som orienterte om deira tilbod til sine fjernstudentar. Mellom anna merka vi oss at i ei undersøking dei hadde gjord svara mange av studentane at dei nytta det lokale folkebiblioteket fordi dei var svært så nøgde med servicen der(!). Men hovudpoenget var at høgskulen tek ansvar for sine fjernstudentar og sender dei bøker direkte. Problemet er at dei må koste returportoen sjølve - det slepp dei om dei nyttar folkebiblioteket.

Ellers vart det snakka om både den Kulturelle skulesekken, mobil bibliotekteneste og fylkesbiblioteket sitt meldingsblad “Over skranken” som frå no av berre vil komme i nettutgåve.

Til slutt var det eit “historisk” utandørs årsmøte i NBF-Sogn og Fjordane - det kjem dei vel med eit referat frå sjølve. 

Takk til alle for trivelege dagar!

Gunnvor Schei
Fylkesbiblioteket

Orientering om Høgskulen i Sogn og Fjordane sine tjenester overfor fjernstudenter

Høsten 2000 startet Høgskulen opp med desentralisert utdanning av allmenlærere i Florø og Gol og førskolelærere i Florø og Sogndal. Høsten 2001 startet en desentralisert allmenlærerutdannelse i Hardanger, og høsten 2002 er planen å starte opp med desentralisert allmenlærerutdanning i Sogndal og på Dokka og førskolelærerutdanning i Sogndal. 

Som bibliotek med ansvar for en ny gruppe studenter som ikke skulle oppholde seg i Sogndal til daglig, gjorde vi oss en god del tanker om hvordan vi skulle kunne betjene dem på en tilfredsstillende måte og vi satte opp en del punkter å jobbe etter:

• Fjernstudentene skal ha de samme rettigheter som studentene på campus.

• Fjernstudentene må fortest mulig læres opp i å kunne benytte bestillingsfunksjonene i Bibsys, og vi må forsøke å gi dem opplæring i informasjonssøking i løpet av det første året.

• Fjernstudentene skal ha egen informasjonsside fra bibliotekets hjemmeside.

• Det må ut informasjon ut til folkebibliotekene i de aktuelle områdene.

• Evaluering

Fjernstudentene skal ha de samme rettighetene som studentene på campus
Det er en selvfølge for oss, så langt det kan la seg gjøre. 

Opplæring i informasjonssøking
Vi starter med å gi en førstehåndsintroduksjon og opplæring i bestillingsfunksjonen i Bibsys ved oppstart. Opplæring i informasjonsssøking har ellers foregår i forbindelse med en regional samling i løpet at det første året og i samarbeid med fagpersonalet. Opplæringen har vært knyttet til et  prosjektarbeid eller lignende, hvor studentene har hatt god tid til å innhente informasjon.

En bibliotekar har reist ut med fagpersonalet på en regional samling, på de fleste av DNETT-utdanningene. (DNETT står for desentralisert nettbasert utdanning)

Informasjonsside for fjernstudenter
www.hisf.no/biblio/  klikk på fjernstudenter i venstremargen for å se siden.
Her står det litt om hvem som kan benytte seg av våre tjenester og hvilke rettigheter de har. Som fjernstudent kan man bestille lån og kopier gjennom Bibsys og materialet sendes gratis med posten til den enkelte, men de må selv sørge for returen. Denne siden har et stort forbedringspotensial.

Informasjon til folkebibliotekene
Vi fant først ut at vi måtte forsøke å komme i kontakt med så mange av de lokale folkebibliotekene som mulig for å forberede dem på oppstart av de desentraliserte utdannelsene. Høsten 2000 gikk det ut et brev fra daværende underdirektør Randi Skår til så mange berørte folkebibliotek rundt Florø og Gol som mulig. I dette brevet ble det informert om de desentraliserte utdannelsene og litt om ansvarsforholdet overfor disse studentene. Brevet sier noe om at HSF har det overordnede bibliotekansvar overfor DNETT-studentene og at studentene får mulighet for å bruke bestillingsfunksjonen i Bibsys for å kunne bestille  materiale og få det sendt direkte til sin hjemadresse med beskjed om at de selv har ansvar for returnering. 

Evaluering
Vi forsøker å få evalueringsskjema fra de ulike Dnett-utdanningene. En av konklusjonene vi kan dra ut fra dem vi har fått inn så langt er at: De studentene som ikke benytter seg av bestillingsfunksjonen i Bibsys svarer at grunnen til det er at de benytter sitt lokale folkebibliotek og at de er meget godt fornøyde med de tjenester de yter overfor dem.

Statistikk
HSF-bibliotekene lånte i 2001 ut 3004 bøker til andre bibliotek. Herav stod folkebiblioteksektoren for hele 46 % av lånene. Biblioteket Fosshaugane som betjener lærer- og førskolelærerutdanningen har det største utlån til folkebibliotekene. Av utlån til andre bibliotek i 2001 stod folkebiblioteksektoren for 58% av lånene. En logisk forklaring på at andelen av utlån til folkebibliotek er så stor mener vi nettopp kan være at mange fjernstudenter går til sine lokale folkebibliotek som så igjen går til oss for å låne den aktuelle litteraturen.

Samarbeid med folkebibliotek
Jeg er helt sikker på at samarbeidet med folkebibliotekene kunne ha vært mer og bedre, men vi har utrolig mange folkebibliotek å forholde oss til og er veldig usikre på, hvordan vi kan gjøre dette bedre. Så hvis det er noen som har noen gode ideer, eller innspill til oss må de mer enn gjerne ta kontakt med oss.

SOFF-prosjektet
(SOFF står for: Sentralorganet for fjernundervisning på universitets- og høgskolenivå)

Da  ALU (avd. for lærer- og førskolelærerutdanning) i HSF, fikk tildelt 700.000 fra SOFF, bestemte bibl. Fosshaugane seg for å forsøke å få noen av disse midlene knyttet til bibliotektjenesten overfor fjernstudentene. Å betjene desentraliserte studenter er for biblioteket dyrere enn å betjene studentene på campus. Det krever flere eksemplarer av tilleggslitteraturen, da bøkene er ute lengre og det blir høye portoutgifter.

Vi søkte om midler for studieåret 2001/2002. Vi fikk 70.000 d.v.s. 10% av den summen ALU fikk til prosjektet. Noen av pengene har vi brukt  til en studietur for 2 personer til en konferanse i Odense med tittelen: ”Nettbasert læring i biblioteksperspektiv – teknologi, design og pædagogiske utfordringer”

Her ble flere ulike brukeropplæringsprogram for nettet presentert. Vi vil med inspirasjon fra denne konferansen forsøke å forbedre vår hjemmeside med et opplæringsprogram i en eller annen form, som skal supplere den opplæring vi allerede driver med. Resten av pengene og det er mesteparten blir brukt til å supplering av tilleggslitteraturen som fjernstudentene etterspør i forbindelse med prosjektskriving m.m.  

Vi har nettopp avlevert en ny søknad, hvor vi håper på å få flere midler fra samme prosjektet for å følge opp det arbeidet vi har påbegynt.

Avdelingsbibliotekar Bente Hatlevoll
Biblioteket Fosshaugane, Høgskulen i Sogn og Fjordane

Kva skjer med ”Den kulturelle skulesekken” i fylket vårt?

Mange av lesarane lurer kanskje framleis på kva ”den kulturelle skulesekken” (frå no kalla DKS) er for noko.

Det starta med at dåverande statsminister Stoltenberg lanserte DKS som eit kulturtilbod som alle skulebarn i landet skulle få, inspirert av prosjekt i Møre og Romsdal og Sandefjord. Det vart ikkje løyvd meir enn ein brøkdel av den summen som landet trong for å gje alle skuleelevane det Stoltenberg hadde lova. Sogn og Fjordane fekk 250 000 for skuleåret 2001/02. Fylkeskommunen bidrog med ein god del og kommunane betalar 10 kr pr. elev pr tilbod i året. Kvar elev får 4 tilbod i året, altså betaler kvar kommune 40 kr pr. elev i året.

Kulturavdelinga på fylket har ansvaret og har ein prosjektleiar i 50% stilling, Margrethe Henden Aaraas. Prosjektet har eit styre kor både Kulturdirektør Lidvin Osland og Utdanningsdirektør Bjørn Tønnesen sit. Dei seier sjølv at dette er eit prosjekt dei trur sterkt på og gjerne vil få til eit godt samarbeid om. På kommunenivå er det også heilt nødvendig at skule- og kultursektorane klarar å få til eit godt samarbeid.

Pilotkommunar

Åtte kommunar blei plukka ut til å vere med i DKS; Stryn, Hornindal, Flora, Naustdal, Høyanger, Hyllestad, Årdal og Lærdal. Entusiasmen har var stor både hos kulturtilsette, skular og ”leverandørar”. Vi har klart å få til mykje på svært kort tid og det har vi mykje igjen for. I Oslo er dei så imponert over alt som er skjedd i Sogn og Fjordane på kort tid at dei for neste skuleår har løyvd oss høgste moglege tilskot, 750 000 kr.

Men det har vore mykje slit og skulane har tildels fått tilboda seint på våren, i ein periode dei ofte driv mykje utanfor skulen. Nyleg var det eit evalueringsmøte med skulefolk og kulturfolk frå pilotkommunane. Dei kom med mykje skryt over tilbodet dei hadde fått dette halvåret og hadde stor forståing for at det blei vanskeleg å få det til knirkefritt. Dei melde også at tilboda i katalogen for neste skuleår var veldig bra. No får vi berre vone at vi som skal arrangere tilboda får det betre til.

Fylkesbiblioteket og andre institusjonar

Fylkesbiblioteket si rolle i DKS er å finne forfattarar til forfattarturnear og lage turneane. Vi vil også prøve å finne på andre lesestimulerande tilbod. I år har vi hatt eit godt samarbeid med teateret om å ”låne” ein skodespelar til å reise rundt og lese og fortelje om Rune Belsvik. Dessverre var ikkje skulane heilt nøgd med dette tilbodet så vi får prøve å gjere det betre neste gong. Vi vil absolutt fortsetje å samarbeide med teateret. Det kan også være andre institusjonar vi kan samarbeide med om å få skulebarn til bli glade i litteratur. Her gjeld det å leggje hovudet i bløyt og tenkje nytt. Endeleg har vi pengar til å gjere noko. Kom med idear til oss!

Folkebiblioteka si rolle i DKS

Kvar kommune har, enten den er fattig eller rik, eit folkebibliotek. Det er viktig at biblioteket er med og markerer seg i DKS. Når vi no endeleg får ei skikkeleg kultursatsing overfor barn i dette landet, har biblioteket ein jobb å gjere når skulane skal førebu seg til besøk av ein kunstnar, til dømes, eller når læraren eller elevane er blitt inspirert og vil vite meir, lese meir, sjå fleire bilder osb. Kvar kommune har eit Kulturforum kor dei jobbar med DKS. Biblioteksjefane burde få vere medlem av dette utvalet slik at dei alltid veit kva som skjer. Kanskje biblioteka i framtida sjølv kan arrangere forfattarbesøk til eiga kommune, evt. saman med bibliotek i nabokommunen.

Fleire kommunar med i DKS

Stortinget har bestemt at 160 millionar frå tippemidlar skal gå til DKS, og fylket vårt vil med tida få meir til DKS så det vert nok snart fleire kommunar som får høve å delta. Måler er at alle skal vere med og at alle skuleborn får like mykje.

Anne Sagen
Fylkesbiblioteket 

[Toppen]

Bollefisen og Dustefjerten

- Snøballane fyk mellom gutane. Det same gjer ufine og ertande ord dei i mellom. Fykande ballar og ord vert til nye utkropne idear som vert til ville handlingar.- Eit 30-tals 8-åringar sit spente og følgjer kampen mellom gutane. Stundom lyder letta latter, andre tider held dei pusten i spaning.

Thorbjørn Halvorsen frå Sogn og Fjordane teater sit på Gloppen folkebibliotek og les for 2.- og 3.klassingar. Det er Bollefisen og Dustefjerten, Adele, Ola og Stian og verdas mest forelska par som vert verkeleggjorde for elevane. Dessutan får dei høyre om hårklipp og kuletyggis. Ungane ler og undrar seg med Rune Belsvik, og bileta frå forteljingane som Thorbjørn har med seg vekkjer interesse og vert kommenterte. Etter den vesle halvtimen lesestunda varer, myldrar ungane ut i biblioteket. På kort tid vert utstillinga vi har laga med Rune Belsvik plukka for bøker. Fint at elevane kunne få bruke litt tid i biblioteket og.

Det vart eit levande møte mellom litteratur og barn, men nokre tankar gjer ein seg etterpå. Biblioteket kunne kan hende i innbydinga ha presenter opplesaren og forfattaren litt meir.

Invitasjonen gjekk frå 1.-4. klasse, og det er eit ganske stort aldersspenn. Tilbodet kunne gjerne gå ut til denne gruppa, men opplesaren kunne kanskje ha laga seg to ulike opplesingsalternativ; eit for dei yngste og eit for dei litt eldre. Illustrasjonar er svært positive.

Veka etterpå fekk filialen på Byrkjelo framsyninga, og til den var elevane i 1.-4. klasse ved Byrkjelo skule inviterte.

Vi er glade for desse opplevingane og håper dette er eit tilbod som vil kunne gjenta seg . Takk til teateret for godt samarbeid og god formidling av litteratur.

Wenche Søreide
Gloppen folkebibliotek

[Toppen]

Førde bibliotek markerer Verdas bokdag 2002

Tema for bokdagen 2002 var ”Kulturelt mangfold”. Vi i Førde bibliotek meinte vi burde bruke dette høvet til å få høyrt og sett litt av alle dei språk og nasjonalitetar som for tida er representert i kommunen. Bebuarane ved Bergum mottakssenter er flittige brukarar av biblioteket, og vi tok derfor kontakt der for å få eit samarbeid. Vi kontakta også Sunnfjord folkehøgskule, som m.a. har eit sterkt innslag av elevar frå Asia. Responsen var stor på begge stader, og ut av alle ideane skulle programmet til slutt bli ein slags lesestafett der deltakarane las på sitt språk frå sin litteratur, med oversetjing eller resyme på norsk. 

Berit Snøan frå  Sogn og Fjordane teater losa oss gjennom forestillinga, lagt opp som ei reise på kartet, markert med  flagga til dei landa vi var innom. 

Vi starta med  Førde-historie av ein lokal forfattar. Reisa gjekk så til Ukraina og Armenia, gjennom Irak, India og andre asiatiske land. Vi var innom Chile, Somalia, til Bosnia og enda opp i Sunnfjord med Jakob Sande sitt dikt ”Til ei utsliten tann”. 

Vi fekk undervegs mellom anna høyre Pusjkin på russisk, Shakespeare på engelsk, Neruda på spansk og eventyret om ”Reven og geita” på somali. Nokre av innslaga var musikalske, trekkspeltonar frå Armenia, vals frå Ukraina framført på baryton og bosnisk folkesong. Igor, biletkunstnar frå Ukraina, var dagens helt. Han heldt  utstilling i biblioteket av dei om lag 20 bileta han hadde måla/teikna på 3-4 månader på mottaket. Dei fleste utøvarane var uvande med å opptre, det var ein del nervøsitet, og for enkelte tok kjenslene overhand i møte med litteraturen frå heimlandet. 

Totalt sett var dette ei svært positiv oppleving av kulturelt mangfald.  Deltakarane var glade og stolte over å få vise noko som var deira. Vi fekk idear til nye arrangement og til nye samarbeidsformer. Vi oppdaga også at flyktningar/asylsøkjarar ikkje er ei  einsarta gruppe, men kan vere einskildpersonar med  store ressursar.

Førde Interbok stilte med roser til deltakarane og ei flott bokutstilling til temaet kulturelt mangfald, bøker om mat, musikk, reiser, språk etc. 

Fleirtalet av publikum var ikkje-norske, men også nokre interesserte sunnfjordingar møtte fram.

Marie Dombestein 
Førde bibliotek

[Toppen]

Landsomfattande arrangement

I haust er det fleire større, landsomfattande arrangement der arrangørane gjerne vil at biblioteka skal involvere og engasjere seg. Her omtalar vi kort fire av desse, og ser gjerne at bibliotek i fylket deltar på eitt eller fleire. 

Forskingsdagane - 20.-29. september
Forskingsdagane "inviterer alle forsknings- og kunnskapsinstitusjoner til å bli med på årets festival" - og der passar jo biblioteka inn. Fristen for å søke Statens bibliotektilsyn om økonomisk støtte i samband med forskingsdagane er gått ut, men det er ingenting i veien for  å få til arrangement ellers også. Forskingsdagane har som mål "å være en god arena for alle typer kunnskaps- og forskningsbaserte arrangementer rettet mot allmennheten". På nettsidene til Forskingsdagane finn ein mange tips og idear.

SeniorSurfdagen - 8. oktober
Foreningen Seniornett Norge inviterer biblioteka til å bli med på årets SeniorSurfdag, der seniorar kan få prøve seg på internett i sitt nærmiljø. Seniornett har sett opp desse måla for SeniorSurfdagen:

• Få til 400 møtesteder der minst 15.000 seniorer kan få prøve seg på Internett

• Skape blest om internettilbudene som finnes i lokalmiljøene

• Synliggjøre de eldres rolle i forhold til ny teknologi

• Få nye seniorer til å bruke internett

• Finne frem til temaer for å vekke interessen hos denne aldersgruppen, f.eks e-post, slektsforskning, helse, reiser.

• Inspirere seniorer til å lage lokale grupper som vil lære mer om data og som vil dele denne kunnskapen med andre.

Biblioteka har slutta godt opp om dagen tidlegare år, og vi håpar dette også vil vere tilfelle i år. Les meir på seniornett.no.

Aksjon tXt 2002: Tekst blir bilde
Foreningen !les arrangerar for femte år på rad ein landsomfattande leseaksjon for barn og unge i alderen 13 til 16. Årets aksjon heiter "Tekst blir bilde", og foregår i tida 10. oktober til 10. november. Foreninga har som mål at minst 30 000 ungdom og formidlarar skal delta i årets aksjon.

Aksjonen i år går ut på at deltakarane les ei bok med utdrag frå 16 nye norske og omsette ungdomsbøker. Pocketboka inneheld også fire illustrasjoner, og konkurransen går ut på at deltakarane må finne kva for fire av dei 16 tekstane som høyrer saman med illustrasjonane. Deltakarane blir også oppmoda til å lage eigne bilete/illustrasjonar til tekstane.

Tidlegare år har ein hatt gode erfaringar med at biblioteka engasjerar seg i aksjonen i samarbeid med skulane. Les meir på Foreningen !les sine nettsider. 
NB. Påmeldingsfrist er eigentleg 22. juni, men det er nok mogeleg å få delta om ein melder seg på eit par dagar etter.

Veka for vaksne si læring
Vaksenopplæringsforbundet (Vofo) arrangerer i år Veka for vaksne si læring 14.-20. oktober, og veka har mottoet "Læring Engasjement Deltakelse - Du bestemmer". Det er aktuelt for biblioteka å markere denne veka, gjennom eigne arrangement eller i samarbeid med Vofo eller andre. Les meir om veka på Vofo sine nettsider. 

Anja Angelskår Mjelde
Sogn og Fjordane fylkesbibliotek

[Toppen]

Bokbåten hausten 2002

Bokbåtturen til hausten vil gå i perioden 11. til 29. oktober. Bokbåten EPOS skal då innom 38 stader rundt om i fylket. I tillegg til alle bøkene skal me også ha med oss eit kulturprogram for barn. Denne gongen er det Stein Lunde med dokketeaterframsyninga “Tommeliten og Røverne” som skal vera med oss. Stein Lunde har vore med bokbåten fleire gonger tidlegare med forskjellige framsyningar. “Tommeliten og Røverne” byggjer på eit tsjekkisk folkeeventyr.

Me har fått god respons på Bokbåtklubben og medlemsbladet, men kunne nok ha ønska fleire bidrag til konkurransane. Denne gongen oppfordrar me medlemmane til å skriva ei bokmelding eller laga ein teikning. Bidraga vert premierte med flotte T-skjorter frå Bokbåtklubben.

Før haustturen reknar me med å ha klart eit nytt nummer av medlemsbladet for Bokbåtklubben. Dette vert sendt ut til alle medlemmane (268) og til hovudbiblioteka i fylket. 

Ingrid Dræge
Fylkesbiblioteket

[Toppen]

Bokbussruta

Bokbussruta for hausten 2002 og våren 2003 er no klar, og er lagt ut på http://www.sf.fylkesbibl.no/bussrute.htm

[Toppen]

Breibandskartlegginga

Fylkesbiblioteket har på vegner av Statens bibliotektilsyn kartlagt både status for breiband og framtidige breibandsplanar i folkebiblioteka her i fylket. Etter ein god del purring har vi no fått skjema og dei opplysningane vi bad om frå dei aller fleste.

Åtte av folkebiblioteka i fylket har alt breiband, men ein del av desse har breiband berre for personalet. Ein stor del av biblioteka har planar om breibandsetablering i 2002/2003, evt. utviding av den tilgangen dei har, medan enkelte må vente enno litt lenger på ei slik tilknytting. 

Anja Angelskår Mjelde
Fylkesbiblioteket

[Toppen]

Kurset i Mikromarc 2

Fylkesbiblioteket arrangerte kurs i Mikromarc 2 den 6. og 7. februar i år. Første dag var grunnleggande om katalogisering/registrering i MM2, medan ein gjekk litt grundigare inn i systemet dagen etter. Det var 10 deltakarar på kvar av dagane, dei aller fleste frå folkebiblioteka, men første kursdag var det også 1 frå vidaregåande skule og 2 frå grunnskule.

Vi hadde dyktig kurshaldar frå Bibliotekenes IT-senter (Bibits), og vi fekk positive  tilbakemeldingar på kurset. Fylkesbiblioteket vil vurdere å arrangere tilsvarande kurs seinare dersom det er behov for dette.

Anja Angelskår Mjelde
Fylkesbiblioteket

[Toppen]

Årsmøte i NBF Sogn og Fjordane

Referat frå årsmøtet 5. juni 2002
Møtet vart halde på Quality Hotel Sogndal

Sak 1 - Val av ordstyrar, referent og to personar til å skrive under møteboka
Ordstyrar: Torill Berge
Referent: Randi Tveit Solheim
Skrive under møteboka: Else-Marie Kirkhus og Eli Johanne Eidsvik

Sak 2 - Godkjenning av innkalling og sakliste
Innkalling og sakliste vart godkjent utan merknader.

Sak 3 - Årsmelding 2001/2002
Randi Tveit Solheim las opp årsmeldinga. 
Årsmeldinga vart godkjent utan merknader.

Sak 4 - Revidert rekneskap 2001/2002
Grete Skaar Sunde las opp rekneskapen.
Rekneskapen vart godkjent utan merknader.

Sak 5 - Verkeplan 2002/2003
Det er ikkje utarbeida nokon ny verkeplan, vil bruke den vi hadde i fjor. 
Dette vart godkjent.

Sak 6 - Budsjett 2002/2003
Grete Skaar Sunde las opp budsjettet for neste år. 
Budsjettet vart godkjent utan merknader.

Sak 7 - Val
Valnemnd: Anne Jorunn Nesje, Torhild Berge og Svanhild Oppedal

Val av leiar
Valnemnda hadde ikkje forslag til ny leiar. Årsmøtet gav styret fullmakt til å konstituere seg sjølv med leiar. Sigrid Gjelsvik kallar inn til konstitueringsmøte.
Gry Hatlelid og Astrid Kalstveit går ut av styret. Iren Riksheim Østvik og Sigyn Melvær Sunde stiller som nye styremedlemar.

Styremedlemar
Sigrid Gjelsvik
Iren Riksheim Østvik (ny)
Grete Skaar Sunde
Sigyn Melvær Sunde (ny)
Randi Tveit Solheim

Varamedlemar
Gunnvor Schei for Grete Skaar Sunde
Eli Johanne Eidsvik for Sigrid Gjelsvik
Reidun Koksvik for Iren Riksheim Østvik
Erik Torp Nilssen for Sigyn Melvær Sunde
Jorun Systad for Randi Tveit Solheim

Revisorar
Siri Ingvaldsen og Elsa Stentvedt var ikkje på val og blir sitjande

Ny valnemnd
Torhild Berge (leiar), Anne Jorunn Nesje og Ingrid Dræge

Sak 8 - Ymse
Det kom forslag om ein studietur neste år. Det har vore jobba med studietur til Finland tidlegare, utan at dette er blitt noko av, fordi ikkje mange nok melde seg på. Finland er framleis eit ønske frå mange, men vi må truleg legge turen opp litt annleis, t.d. mindre reisetid. 
Årsmøte vil at det skal arbeidast vidare med studietur til neste år.

Randi Tveit Solheim,
referent

[Toppen]

Nytt om namn

På fylkesbiblioteket vil Gunnvor Schei fram til nyttår ha stilling som 1.bibliotekar. Ho vil fungere som nestleiar og avlaste Solveig Bjordal i denne perioden. 

Ann Elisabeth Opland skal flytte til Førde i sommar, og får overflytting frå  Biblioteket Fosshaugane ved høgskulen i Sogndal til høgskulen si bibliotekteneste i Førde.

Frå Gloppen folkebibliotek har vi fått denne meldinga:
"Marit Henden sluttar 30. juni etter 27 år i Gloppen Folkebibliotek. Då er ho pensjonist, og vi må klare oss utan hennar kapasitet på lokalhistorie, gode norske og omsette romanar, hage og reise for å nemne noko. Det er ein aktiv og arbeidsom kollega vi no takkar for inspirerande og godt samarbeid gjennom mange år. Ganske visst vil Marit halde fram med å vere aktiv og engasjere seg, og vi ønskjer henne ei levande og innhaldsrik tid som pensjonist. Ei lita påminning, Marit: Bruk biblioteket!"

I Gloppen er elles Ann-Kristin Vik Fløtre tilsett i 50 % fast stilling som bibliotekar frå 8. juli. I tillegg er ho tilsett i 20 % vikariat for biblioteksjef Torill Berge, vikarstillinga tar til 1. august.

[Toppen]