Innhald

	Kva skjer med bokbuss og bokbåt?
	Bibliotekdagane 2000
	Pedagogikk i verkstader for sjølvstudium
	Ski på Førde bibliotek
	Fjognedok
	Den lokalhistorisk spørjeveven har opna
	Nytt om namn
	Tilskot til biblioteklokale
	Crème Brulée

Kva skjer med bokbuss og bokbåt?

Sidan regjeringa la fram St. prp. 62 "Kommuneøkonomiproposisjonen 2001, har det vore mykje rabalder og uvisse rundt bokbuss og bokbåt. I proposisjonen var det forslag om å avvikle dei øyremerka tilskota til mobil bibliotekteneste.

Etter store protestar frå bibliotekmiljøa i heile Noreg, har Stortinget bestemt følgjande. Tilskotet til mobil bibliotekteneste på ca. 15 millionar vert no innlemma i kommunane sitt inntektsystem. For at kommunane skal få tid til omstilling vil ein leggje opp til overgangsordningar med gradvis nedtrapping av tilskotet fram til 2005. Det vil seie at i 2001 får ein 80% av tidlegare statstilskot, i 2002 får ein 60%, i 2003 får ein 40%, i 2004 får ein 20% og i 2005 er omstillingsperioden slutt.

Når det gjeld nærare detaljar ventar vi på informasjon frå Statens bibliotektilsyn.

Sogn og Fjordane fylkesbibliotek satsar på at vi får finansiert ordninga for 2001 utan for store meirkostnader for kommunane, men allereie frå 2002 må vi rekne med endringar. Fylkesbiblioteket vil ta kontakt med bokbuss- og bokbåtkommunane utover hausten 2000.

Du kan lese meir på NBF sine heimesider og i e-postarkivet til biblioteknorge-lista. 

Solveig Bjordal

Bibliotekdagane 2000 i Florø

I år vart dei tradisjonelle bibliotekdagane avvikla i Florø i tida 29. – 30. mai.
Møtet starta med samrådstimen.
Biblioteksjef Randi Bjørneset fortale at no er biblioteket klår for å flytte inn i nye lokale i Askvoll skule. Biblioteket får eit eige datalaboratorium. Mykje bra utstyr vert kjøpt inn fordi Askvoll er ein pilotkommune og får statlege utviklingsmidlar. Utfordringa for folkebiblioteket no er å ikkje berre verte eit bibliotek for skulen, men å halde på dei ”gamle” lånarane.

Fylkesbiblioteksjef Solveig Bjordal informerte om St.prp. om kommuneøkonomien og kva for verknader bortfall av dei øyremerka midla får for kommunane i Sogn og Fjordane.
Vidare vert det orientert om status på BibliotekNett og det lokalhistoriske prosjektet ”Fjognedok”.

Etter lunsj gjekk turen med båt til den vakre øya Batalden der kunstnaren Gunnhild Bjelland held til med utleige av båtnaust og galleri. Her vart årsmøte i NBF avvikla.

Andre dagen vart via ”det fleirkulturelle biblioteket”. Møtet vart opna av nydeleg dans av Karthika frå Florø.

Første førelesar var flyktningkonsulent i Florø Arild Melvær. Han fortalde at vi no har 3200 innvandrarar i Sogn og Fjordane, og at vi har fått fleire kvinner og eldre. Han var oppteken av at vi må kome i betre dialog med innvandrarane. Vi må møte dei som individ og ikkje som gruppe. Vi generaliserer for mykje. Det er store skilnader innanfor gruppene.

Florø kommune får tilskot til både asylantar og innvandrarar. Overskotet på ca. 2 mill. går til kommunekassa for å styrke infrastrukturen i kommunen. Folkebiblioteket får kr. 30 000,-.

Distriktsbibliotekar Ellen Kristin Molvær i Møre og Romsdal følgde opp med kvifor det er viktig å satse på bibliotektenester til innvandrarane. Fyrst og fremst er det til for å styrke identiteten og språket, halde på morsmålet og lære norsk. Biblioteket kan hjelpe til å halde kontakten med heimlandet og hjelpe til med evt. tilbakevending. Utfordringane er fleire for biblioteka. Fagleg går det på økonomi og organisering, men vi har og etiske utfordringar, religiøse og politiske t.d. i mediaval. Ho rådde til å vere konsekvent og ikkje la seg presse. Ho la og vekt på at vi har ein del personlege utfordringar som å overvinne sjenanse og fordommar.

Biblioteksjef i Flora Eli Eidsvik fortalde om erfaringane frå Flora. Biblioteket har eit innlån på 20 språk og biblioteket er mykje brukt. 1/3 av dei besøkande er innvandrarar.  Det er mange born på biblioteket og dei drar med seg mødrene. Særleg er tamilske jenter flittige bibliotekbrukarar. Målet for Flora bibliotek er å gjere innvandrarane til ein1 naturleg del av biblioteket.

Avdelingsleiar Kirsten Leth Nilsen frå Det flerspråklige bibliotek på Deichmann fortalde om tilbodet deira og oppfordra biblioteka til å ta kontakt og bruke dei framfor å bygge opp eigne boksamlingar.

Møtet avslutta med ein paneldebatt om biblioteka si rolle i tilbodet til innvandrarar. Her kom det fram at  biblioteket er gode sosiale rom for fleirkulturelt samkvem, dei er nøytrale og kan verte gode brubyggjarar. Ei undersøking syner at innvandrarane  låner meir enn andre og meiner at biblioteket er svært viktig for dei. Biblioteket er ein naturleg møteplass, vi treng difor ikkje skape nye. Biblioteket er ein viktig port for å oppdage eigen identitet og norsk kultur. I debatten kom det elles fram at mange reagerte på at biblioteket fekk ein altfor liten del av kommunen sitt tilskot til innvandrarar og asylantar. Det blei understreka at det er viktig for biblioteka å målbere sine behov for kommuneleiinga. Biblioteket kan søkje  om tilskot til både inventar utstyr, media eller personalressursar.

Fylkesbiblioteket har ein del materiale som kan sendast til interesserte bibliotek som ikkje var på møtet.

Heimesida til Det flerspråklige bibliotek

Førde kommune har komme med i prosjektet "Pedagogikk i verkstader for sjølvstudium". Prosjektet omfattar eit praktisk utviklingsarbeid i biblioteket og eit 10- vektallstudium for to personar. Studiet skal gje dei tilsette høve til å utvikle kompetanse i rettleiing av vaksne slik at biblioteka kan bli betre læringsarenaer i samband med etter- og vidareutdanningsreforma. Studietida er tre semestre og startar hausten 2000.

Hordaland fylkesbibliotek leiar prosjektet og har engasjert Høgskolen i Bergen, avd. for lærarutdanning til å utarbeide og arrangere studiet. For meir informasjon om studiet.

Fylkesbiblioteket ønskjer Førde kommune og "studentane" lukke til med eit viktig prosjekt.

Ski på Førde bibliotek

Sogn og Fjordane Skikrins har i samarbeid med fylkesbiblioteket starta utlån av ski frå desse biblioteka i Sogn og Fjordane; Førde, Sogndal, Stryn, Gloppen. Jølster og Årdal. Her ei ein oppsummering og nokre synspunkt frå Førde bibliotek.

Utpå nyåret 2000 fekk Førde bibliotek sju par ski frå Sogn og Fjordane Skikrins. Skia skulle nyttast til utlån og blei levert med bindingar, stavar og skiposar. Sogn og Fjordane fylkesbibliotek spanderte skisko i ulike storleikar.

Dette er i samband med eit prosjekt som skikrinsen har for å rekruttere 6-åringane til skigåing. Difor er det berre ski i den storleiken, men born frå 4-8 år kan nytte dei. Vi har skisko frå nummer 31 til 35. Skistavane er også i ulike storleikar.

Det gjekk litt tid før skia var klar, så skisesongen var nærmast på hell før vi kom i gang med utlånet og veret var heller ikkje det aller beste. Men tilbodet er populært. Vi låner ut skia 1 veke om gongen, med høve til fornying av lånet, dersom det ikkje er venteliste på dei. I utgangspunktet hadde vi tenkt å registrere skia i Bibliofil og sette strekkodar på dei, men sidan vi kom så seint i gong og det store rushet ikkje kom, har vi brukt ei liste der utlånsdato, lånarnummer, skiskonummer, utlån av skistavar, lånaren si underskrift og innleveringsdato blir registrert. Det har fungert greitt.

Borna må ha med seg vaksne, når dei skal låne ski og skia skal vere reingjorde ved innlevering. Ein god grunn til å låne ski på biblioteket er at borna veks fort i den alderen og det er dyrt å måtte kjøpe skiutstyr kvart år. Også foreldre med utanlandsk bakgrunn som kanskje ikkje er van med skitradisjonen vi har her i landet, kan gi borna sine høve til å prøve ut skigåing utan at det skal koste noko. Skulane opplever ofte at det er born som ikkje har ski når dei skal ha skidagar, og i slike tilfelle kan
det vere aktuelt å gå til biblioteket å låne skiutstyr. Det er også mange vaksne som har vore interessert i å låne ski til seg sjølve, men dei kan vi nok ikkje hjelpe.

Skiutstyret er altså ei gåve frå Skikrinsen og fylkesbiblioteket og vi syntest det var interessant å prøve dette ut. Så lenge skia er nye og utan skadar, og lånarane er flinke til å reingjere skia før dei blir innlevert, er dette eit svært godt tilbod til publikum. Men kven skal reparere skia når det blir aktuelt og kven skal betale for det? Er det riktig å bruke av biblioteket sine knappe ressursar til å kjøpe inn nye ski, stavar eller sko? Skal ikkje vi heller levere informasjon om ski og skigåing, framfor å levere skia?

Dersom vi skal halde fram med dette, må vi enten få tilført meir midlar eller samarbeide med ein eller annan organisasjon som er interessert i å ta seg av reparasjonar og nyinnkjøp. Vi har fått mykje positiv omtale i media og elles i denne samanhengen, men denne positive omtalen kan fort snu til det negative, dersom vi ikkje har ressursar til å følgje opp tilbodet på ein skikkeleg måte.

Randi Tveit Solheim
-biblioteksjef-

Tiltrer du i ny stilling, fått nokon nye tilsette eller har det skjedd noko anna du
ønskjer å informere oss andre om?? Send ein e-post til fylkesbiblioteket og fortell!

Endringar vert lagt ut på

 

---

Og til slutt ein liten godbit. Det er visstnok fleire som ikkje kan gløyme desserten dei fekk på Victoria Hotell i Florø under Bibliotekdagane - så her er oppskrifta.
Kos dykk!

Crème Brulée

6 personar, arbeidstid: ca 15 min.
4 eggeplommer
2 heile egg
6 dl kremfløyte
2 dl mjølk
4 ss sukker
6 ts dememarasukker

Smakstilsetjing:
frø av to vaniljestenger eller
1 ss pulverkaffi eller
1 ss revet appelsinskal og
3 - 4 ss appelsinlikør

1. Visp saman eggeplommer, heile egg, fløyte, mjølk og sukker.
2. Ha i smakstilsetjing og la blandinga trekkje i ca. 30 minuttar.
3. Rør opp blandinga og ha ho i ildfaste former, ca. 1,5 dl store
4. Sett formene på rist på nederste ribbe i omnen, og steik puddingane ved 125° C ca 1 time, til dei er faste. Avkjøl i minst 2 timar, gjerne natta over.
5. Dryss dememarasukker (lyst brunt sukker) over puddingane og sett dei under grillen så sukkeret smeltar og vert karamellisert, 2- 3 minuttar. Server med ein gong, eventuelt med frukt eller bær til.

 

---

Fylkesbiblioteket og NBF avd. Sogn og Fjordane ønskjer alle ein riktig GOD SOMMAR!